ខេត្តកោះកុង ៖ លោក ខាំ វង្ស មេប៉ុស្តិ៍នគរបាលឃុំស្រែអំបិល ស្រុកស្រែអំបិល ខេត្តកោះកុង ត្រូវបានមហាជនរិះគន់យ៉ាងខ្លាំង ថាបានប្រព្រិត្តបទសមគំនឹតគ្នា ជាមួយក្មេងប្រុសៗសេពគ្រឿងញៀន នៅក្នុងស្រុកស្រែអំបិល។
ប្រភពព័ត៌មានពីប្រជាពលរដ្ឋសូមមិនបញ្ចេញឈ្មោះបាននិយាយថា លោក ខាំ វង្ស ដែលជាមេប៉ុស្តិ៍ដុះស្លែប្រចាំឃុំស្រែអំបិល បានបើកដៃឲ្យក្មេងៗ ដែលជក់ថ្នាំញៀន និងជួញដូរថ្នាំញៀន និងប្រព្រិត្តបទល្មើសផ្សេងៗទៀត បង់លុយទៅឲ្យមេប៉ុស្តិ៍រូបនេះ ជាប្រចាំខែ ។ តាមប្រភពដដែលបានបន្តថា លោក ខាំ វង្ស មេប៉ុស្តិ៍រូបនេះបានតម្រូវឲ្យក្មេងទាំងអស់នោះ បងលុយក្នុងម្នាក់ ពី ២០០ដូល្លា ទៅ៣០០ដូល្លា ក្នុងមុខសញ្ញា បើអ្នកណាមិនបង់លុយឲ្យមេប៉ុស្តិ៍រូបនេះទេ ត្រូវបានលោក ខាំ វង្ស គំរាមចាប់ដាក់ គុក។ មិនតែប៉ុណ្ណោះ ទេ នៅពេលមានកម្មវិធីផ្សេងៗ និងនៅពេលគេអញ្ជើញទៅក្នុងកម្មវិធី លោក ខាំ វង្ស តែងតែដើរទៅសុំលុយក្មេងៗ ដែលប្រព្រិត្តបទល្មើសទាំងនោះ ដើម្បីយកលុយមកចូលរួមក្នុងពិធី នេះជាទំនៀមទំលាប់របស់លោក ខាំ វង្ស ។នេះបើតាមប្រភពព័ត៌មានពីមិត្តភក្ដិពួកម៉ាករបស់ឈ្មោះ ប៊ូ ងែត ដែលត្រូវជាកូន ប្រុសរបស់លោក នឹម សុវណ្ណនី ហៅ ប៊ូ ត្រូវជា អធិការរង ស្រុកស្រែអំបិល។
តាមប្រភពពត័មានដដែលពីពួកម៉ាកកូនលោក ប៊ូ សូមមិនបញ្ចេញឈ្មោះនិយាយថា កាលឈ្មោះ ប៊ូ ងែត នៅស្រុកស្រែអំបិល លោក ខាំ វង្ស ជាមេប៉ុស្តិ៍ រូបនេះ បានទារលុយពីឈ្មោះ ប៊ូ ងែត ទិញម៉ូតូ១គ្រឿងដើម្បីជាថ្នូរនិងការជួញដូរគ្រឿងញៀនពីឈ្មោះ ប៊ូ ងែត ។
សូមបញ្ជាក់ថា ឈ្មោះ ប៊ូ ងែត ឥឡូវនេះ ត្រូវបានចាប់ខ្លួនហើយ ដោយសារជួញដូរគ្រឿងញៀន ហើយត្រូវបានចាប់ខ្លួននៅភ្នំពេញ ឥឡូវជាប់គុកនៅព្រៃស ។ ឈ្មោះ ប៊ូ ងែត ភេទប្រុស មានអាយុ ២៧ឆ្នាំ។
តាមប្រភពព័ត៌មានពីប្រជាពលរដ្ឋនៅស្រុកស្រែអំបិលបាននិយាយថា តាំងពីលោក ខាំ វង្ស ឡើងធ្វើជាមេប៉ុស្តិ៍ ឃុំស្រែអំបិលជាយូរឆ្នាំមកហើយ មិនដែលឃើញចាប់បានអ្នកលក់គ្រឿងញៀន និងអ្នកចែកចាយថ្នាំញៀនបានម្នាក់ទេ នេះជាការលើកឡើងរបស់ប្រជាពលរដ្ឋក្នុងមូលដ្ឋាន។ ពលរដ្ឋបន្តទៀតថា ថ្មីៗនេះ មានសមត្ថកិច្ចនៅស្រុកបូទុមសាគរ បានមកចាប់ជនសង្ស័យជួញដូរគ្រឿងញៀននៅស្រុកស្រែអំបិលនេះ។
ចំណែកអ្នកសារព័ត៌មានបានទូរស័ព្ទទៅសួរលោក ខាំ វង្ស មេប៉ុស្តិ៍នគរបាលឃុំស្រែអំបិល ដើម្បីសុំការបំភ្លឺរឿងនេះ តែទូរស័ព្ទដាក់សម្លេងជាប់រវល់។
ចំណែកលោកអធិការស្ដីទីស្រុកស្រែអំបិល ឈ្មោះ កែវ ប៊ូរី ហៅ វែង ទើបតែទទួលកាន់តំណែងជាអធិការស្ដីទី បន្ទាប់ពីលោក ម៉ា ទី អធិការ មានជម្ងឺ ។ លោកអធិការស្ដីទី បាននិយាយថា លោកបានលឺគេនិយាយថា លោក ខាំ វង្សនេះ លឺសូរពលរដ្ឋនិយាយដែរ ពាក់ព័ន្ធរឿងរ៉ាវបទល្មើសផ្សេងៗដែរ តែពេលនោះលោកមិនទាន់ជាអធិការទេ។ រឿងនេះ លោកមិនអាចនិយាយបានទេ ទុកឲ្យថ្នាក់លើចុះ មេប៉ុស្តិ៍រូបនេះ លោកនិយាយមិនស្ដាប់ផង ពីព្រោះគេមានខ្សែធំ។
ពាក់ព័ន្ធរឿងរ៉ាវបទល្មើសផ្សេងៗ ដូចជាការលើកឡើងរបស់ប្រជាពលរដ្ឋដែលថា លោក ខាំ វង្ស ជាមេប៉ុស្តិ៍នគរបាលឃុំ បានឃុបឃិតគ្នាជាមួយក្រុមក្មេងជួញដូរគ្រឿងញៀន និងបទល្មើសផ្សេងទៀត រឿងនេះទុកឲ្យស្នងការដ្ឋាននគរបាលខេត្តកោះកុង
មានលោក សំ ឃិតវៀន ដែលជាស្នងការនគរបាល ដែលល្បីល្បាញថា ជាស្នងការមានចិត្តម៉ឺងម៉ាត់ចំពោះការងារ ដែលកូនចៅធ្វើខុសដូចជាលោក ខាំ វង្ស នេះជាដើម។
សង្ឃឹមថា លោកស្នងការ និងមានវិធានការចាត់ការចំពោះមេប៉ុស្តិរូបនេះ បើមិនដូច្នេះទេ មុខមាត់ថ្នាក់ដឹកនាំ មុខជាអាប់អោនដោយសារលោក ខាំ វង្ស មេប៉ុស្តិ៍នគរបាលឃុំស្រែអំបិល ដែលបើកដៃឲ្យមានបទល្មើសខាងជួញដូរគ្រឿងញៀនជាមិនខាន ៕ ដោយ យួន ឈីវ