ខេត្តរតនគិរី៖ នៅយប់ថ្ងៃទី៨ ខែកក្កដា និងនៅថ្ងៃទី៩ ខែកក្កដា ឆ្នាំ២០២១ អភិបាលខេត្តរតនគិរី លោក ថង សាវុន បានដឹកនាំមន្ត្រីក្រោមឱវាទ ចុះពិនិត្យការលក់ដូររបស់ប្រជាពលរដ្ឋ ពិនិត្យមណ្ឌលចត្តាឡីស័ក និងការចុះត្រួតពិនិត្យ ការអនុវត្តន៍វិធានការរដ្ឋបាល នៅក្នុងដែនដីក្រុងបានលុង និងបានក្រើនរំលឹកដល់ប្រជាពលរដ្ឋ កុំឲ្យធ្វេសប្រហែសឲ្យសោះចំពោះជំងឺឆ្លងកូវីដ១៩ បើទោះបីជាអត្រាឆ្លងមានការថយចុះក្នុងរយពេលប៉ុន្មានថ្ងៃចុងក្រោយនេះក៏ដោយ។
លោក ថង សាវុន មានប្រសាសន៍ថា នៅក្នុងរយៈពេលប៉ុន្មានថ្ងៃចុងក្រោយនេះ ចំនួនអ្នកវិជ្ជមានជំងឺកូវីដ-១៩ មានការធ្លាក់ចុះជាបន្តបន្ទាប់ មកត្រឹមតែ ៣នាក់ នៅថ្ងៃទី៨ ខែកក្កដា និងចំនួន ២នាក់ នៅថ្ងៃទី៩ ខែកក្កដា ឆ្នាំ២០២១នេះ ហើយនេះជាសញ្ញាវិជ្ជមានដ៏ល្អមួយ សម្រាប់វិធានការដែលបានដាក់ចេញនូវអនុវត្តកន្លងមក និងការចូលរួមពីសំណាក់បងប្អូនប្រជាពលរដ្ឋនៅក្នុងខេត្តរតនគិរី។ លោកក៏បានបង្ហាញនូវក្តីសង្ឃឹមយ៉ាងមុតមាំ ថានឹងមានលទ្ធផលល្អប្រសើរជាបន្តបន្ទាប់ទៀត។
បងប្អូនប្រជាពលរដ្ឋទាំងអស់ ត្រូវចងចាំជានិច្ចថា បើទោះបីជាចំនួនអ្នកវិជ្ជមានជំងឺកូវីដ១៩ មានការធ្លាក់ចុះក៏ពិតមែន ប៉ុន្តែវត្តមាននៃមេរោគនេះ នៅតែបន្តរស់នៅជាមួយបរិយាកាសជុំវិញខ្លួនយើងជានិច្ច។ ដូច្នេះ ប្រសិនបើមានការធ្វេសប្រហែសតែបន្តិចនោះ អាចនាំឲ្យសភាពការវិលដូចដើមវិញ និងនាំទុក្ខដល់គ្រួសារយើង ។ ដូចនេះសូមបងប្អូនបន្តអនុវត្តវិធានការ ការពារខ្លួនជាប់ជានិច្ច ដូចអ្វីដែលយើងបានអនុវត្តកន្លងមក។
ទន្ទឹមនោះ លោក ថង សាវុន បានថ្លែងអំណរគុណ ដល់ក្រុមគ្រូពេទ្យ កម្លាំងសមត្ថកិច្ច និងអាជ្ញាធរគ្រប់លំដាប់ថ្នាក់ ដែលបានខិតខំសហការ និងការចូលរួមចំណែក ពីគ្រប់ភាគីពាក់ព័ន្ធ សប្បុរសជនទាំងអស់ ក្នុងពេលកន្លងមក ក៏ដូចនៅក្នុងគ្រាបច្ចុប្បន្ននេះដែរ៕