ខេត្តកោះកុង ៖ ថៅកែហាងខារ៉ាអូខេម្នាក់ឈ្មោះលោកស្រី សុខ ណូ និងអ្នកពាក់ព័ន្ធប្រុសស្រី៤នាក់ រងការចោទប្រកាន់ថា បានល្មើសនិងវិធានរដ្ឋបាល ផឹកស៊ីជួបជុំក្នុងទីតាំងរបស់ខ្លួន ត្រូវបានឃាត់ខ្លួននៅយប់ថ្ងៃទី៣០ ខែកក្កដា ឆ្នាំ២០២១ វេលាម៉ោង ២១.៣០នាទី ដោយកម្លាំងប៉ុស្តិ៍រដ្ឋបាលស្មាច់មានជ័យ សហការជាមួយកម្លាំងអាជ្ញាធរ បានចុះឃាត់ខ្លួនម្ចាស់ហាងខារ៉ាអូខេកុលាបស របស់លោកស្រី សុខ ណូ នេះដែលមានទីតាំង ស្ថិតក្នុងភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។ ក្នុងប្រតិបត្តិការនោះ សមត្ថកិច្ចត្រូវឲ្យបង់ការផាកពិន័យម្នាក់ ០២លាននិង៤០ម៉ឺនរៀល ក្នុងម្នាក់ៗ ។ក្នុងចំណោមនោះ មានបុរសពីរនាក់បានបង់ផាករួចរាល់ហើយ នៅឡើយស្តី្រ០៣ នាក់ កំពុងវីវរខ្វះខាតលុយកាក់។
តាមការបង្ហាញអត្តសញ្ញាណពីសមត្ថកិច្ចបានបញ្ជាក់ថា ជនសង្ស័យដែលបានឃាត់ខ្លួន ទី១.ឈ្មោះ សេន បញ្ញា ភេទប្រុស អាយុ៣៥ឆ្នាំ ជនជាតិខ្មែរឥស្លាម មុខរបរ កម្មករ ទីលំនៅបច្ចុប្បន្ន ភូមិ២ ឃុំប៉ាក់ខ្លង ស្រុកមណ្ឌលសីមា ទី២. ឈ្មោះ យីង ភេទស្រី អាយុ១៨ឆ្នាំ ជនជាតិខ្មែរ មុខរបរនារីខារ៉ាអូខេ ទីលំនៅបច្ចុប្បន្ន ភូមិ៣ សង្កាត់ស្មាច់មានជ័យ ទី៣. ឈ្មោះ ញឹប រ៉ាត់ ភេទស្រី អាយុ៣៣ ឆ្នាំ ជនជាតិខ្មែរ មុខរបរនារីខារ៉ាអូខេ ទីលំនៅបច្ចុប្បន្ន ភូមិ៣ សង្កាត់ស្មាច់មានជ័យ ទី៤. ឈ្មោះ សុខ ណូ ភេទស្រី អាយុ៣០ ឆ្នាំ ជនជាតិខ្មែរ មុខរបរថៅកែខារ៉ាអូខេ ទីលំនៅបច្ចុប្បន្នភូមិ ៣ សង្កាត់ ស្មាច់មានជ័យ ក្រុងខេមរភូមិន្ទ និង៥. ឈ្មោះ អួង បញ្ញា ភេទប្រុស អាយុ ៣០ឆ្នាំ ជនជាតិខ្មែរ មុខរបរលក់ប្រេង ទីលំនៅបច្ចុប្បន្នភូមិ៣ ឃុំប៉ាក់ខ្លង ស្រុកមណ្ឌលសីមា ហើយអ្នកទាំងនោះត្រូវបានកសាងសំណុំរឿងបញ្ជូន ទៅការិយាល័យជំនាញចាត់ការ តាមនីតិវិធី ។
បើតាមការអះអាងពីម្ចាស់ហាងខារ៉ាអូខេ លោកស្រី សុខ ណូ បានប្រាប់ឲ្យសារព័ត៌មានយើងដឹងនៅថ្ងៃទី០២ សីហា ២០២១ នេះថា ខ្លួនគាត់ចៀសមិនផុតពីការធ្វើអត្តឃាត ដោយចងក សម្លាប់ខ្លួននោះទេ ខណៈខ្លួនគាត់រកលុយមិនបានគ្រប់ចំនួនលើថ្លៃបង់ផាកពិន័យរបស់បងៗសមត្ថកិច្ច។
ចំពោះមុខបញ្ហាដ៏ធំធេងបែបនេះ ហើយក៏ជាពេលវេលាមួយដែលក្រុមគ្រួសារមួយនេះគ្មានចំណូលទាល់តែសោះ ក្នុងស្ថាភាពវិបត្តិការឆ្លងរាលដាលពីជំងឺកូវីដ-១៩ ខ្លាំងពេញបន្ទុក ហើយមានតែលក់របស់របរដែលនៅសេសសល់ មកដល់ពេលនេះផ្សែផ្សំទៅបានតែជា០៣ លានរៀលប៉ុណ្ណោះ។
ទាក់ទិននិងបញ្ហាប្រឈមមួយនេះ លោកស្រី សុខ ណូ ស្នើរសុំបន្ធូរបន្ថយថ្លៃផាកពិន័យពាក់កណ្តាល និងសូមឲ្យបងៗសមត្ថកិច្ចមេត្តយល់យោគ ដោយចាត់ថាជាកំហុសឆ្គងលើកទីមួយទៅចុះ។ចំពោះការសុំបន្ធូរបន្ថយការផាកពិន័យ ពីសមត្ថកិច្ចនាពេលនេះពោលគឺមានរឿងរ៉ាវពាក់ព័ន្ធជាច្រើនក្នុងបន្ទុកគ្រួសារ ដូចជាអាជីវកម្មគាត់ត្រូវបានបិទផ្អាក បង់ការប្រាក់ធនាគារ របបហូបចុកស្នាក់នៅរបស់បុគ្គលិក ឬឯការរកចំណូលធ្លាក់ដល់កម្រិតសូន្យ ហើយរថយន្ត ម៉ូតូ ត្រូវបានលក់ដោះដូរសម្រាប់ប្រើប្រាស់អស់ពីខ្លួន ។
លោកស្រី សុខ ណូ បញ្ជាក់ឲ្យដឹងបន្ថែមទឿតថា កម្លាំងប៉ុស្តិ៍រដ្ឋបាលស្មាច់មានជ័យ បានឃាត់ខ្លួនលោកស្រីនៅយប់ថ្ងៃទី៣០ ខែកក្កដា ឆ្នាំ២០២១ វេលាម៉ោង ២១.៣០នាទី គ្រានោះ ផ្ទះគាត់ពុំមានបើកចរាចរ បែបកម្សាន្តជាខារ៉ាអូខេទែ គឺជាការហូបចុកជួបជុំលក្ខណៈគ្រួសារប៉ុណ្ណោះ ខណៈអាជីកម្មរបស់គាត់បានបិទផ្អាកជាយូរខែកន្លងមកហើយនោះ ។ លោកស្រីបានអះអាងបែបនេះ ដោយយោងទៅលើ ការរស់នៅជួបជុំក្នុងគ្រសារមិនចេញក្រៅ តាមវិធានការសុខាភិបាល នឹងមិនមានការខុសឆ្គងឡើយ។ មួយវិញទៀតក៏ស្ថិតក្នុង ការអនុវត្តវិធានរដ្ឋបាល បម្រាមគោចរផងដែរ។ដូច្នេះគួរពុំគួរ សូមបងៗសមត្ថកិច្ចមេត្តាយល់យោគលើចំណុចនេះ៕