ខេត្តកោះកុង ៖ តាមប្រភពព័ត៌មានច្បាស់ការពីប្រជាពលរដ្ឋបានឲ្យដឹងថា គ្រួសារប្រជាពលរដ្ឋក្រីក្រមួយចំនួនរស់នៅឃុំថ្មស ស្រុកបូទុមសាគរ ខេត្តកោះកុង មានក្តីទុក្ខសោកយ៉ាងខ្លាំង ដោយសារដីចំការរបស់ពួកគាត់មួយចំនួនដែលកំពុងអាស្រ័យផលនឹងសង្ឃឹមថា អាជ្ញាធរខេត្តនឹងកាឆ្វៀលដីចំការនៅតំបន់នោះជូនពួកគាត់បានគ្រប់គ្រងដោយស្របច្បាប់ តាមគោលនយោបាយរបស់សម្តេចតេជោ ប្រមុខរាជរដ្ឋាភិបាល ខណៈក្នុងកំឡុងពេលកន្លងមកថ្មីៗនេះ មានមន្ត្រីបរិស្ថានខេត្តកោះកុង លោក វ៉េត សុនីម អនុប្រធានមន្ទីរបរិស្ថានខេត្តកោះកុង ដឹកនាំកងកម្លាំងប្រដាប់អាវុធស្រុកបូទុមសាគរ បរិស្ថានស្រុក និងបញ្ហាការពារភូមិ ទៅកាប់ដំណាំប្រជាពលរដ្ឋជាង៣០កន្លែង បណ្តាលឲ្យពួកគាត់អស់សង្ឃឹមពុំដឹងបានអ្វីមកចិញ្ចឹមគ្រួសារ បើចំការរបស់ពួកគាត់ដែលកំពុកពេញអាស្រ័យផលនិងខ្ទមជំរកត្រូវបានបំផ្លាញចោលខ្ទេចខ្ទី ហើយប្រជាពលរដ្ឋមួយចំនួនទៀតក៏កំពុងភិតភ័យនិងព្រួយបារម្មណ៏ ខ្លាចអាជ្ញាធរចុះមកកាប់បំផ្លាញដំណាំកំពុងពេញអាស្រ័យផលរបស់ពួកគាត់ផងដែរ។
ទីតាំងដែលអាជ្ញាធរកាប់ដំណាំពលរដ្ឋនោះរួមមាន (១)នៅចំណុច អូរ រយ៉ូ រយ៉ា (២) បត់ដបទី២ ចំណុចខ្មោច៤នាក់ ស្ថិតនៅក្នុងភូមិ ចំលងគោ ឃុំ ថ្មស ស្រុកបូទុមសាគរ ខេត្តកោះកុង។
(៣) នៅចំណុចព្រែករ៉ាក់ ដែលមានម្ចាស់ចំការឈ្មោះ យួន ឈីវ ដែលអ្នកកាសែត។
(៤) នៅចំណុចព្រែកគល់ ទីតាំងទាំងពីរនេះ ស្ថិតនៅក្នុងភូមិចំការលើ ឃុំថ្មស ស្រុកបូទុមសាគរខេត្តកោះកុង។
តាមប្រភពខាងលើឲ្យដឹងទៀតថា នៅក្នុងការកាប់ដំណាំអាស្រ័យផលជាក់ស្តែងរបស់ប្រជាពលរដ្ឋ គឺក្រោមការដឹកនាំបទបញ្ជារបស់លោក សុខ សុទ្ធី អភិបាលរងខេត្តកោះកុង ដែលទទួលបន្ទុកខាងដីធ្លី។ លោក សុខ សុទ្ធី អភិបាលរងខេត្ត មិនបានធ្វើតាមគោលការណ៍របស់ប្រមុខថ្នាក់ដឹកនាំទេ ហើយមិនធ្វើតាម អនុក្រឹត្យលេខ៣០ ដែលប្រមុខថ្នាក់ដឹកនាំ បានកាត់ឆ្វៀលដីជូនប្រជាពលរដ្ឋ ដែលបានរស់នៅលើដីតំបន់ឧទ្យានជាតិបុទុមសាគរ ហើយត្រូវកាត់ឆ្វៀល បែងចែកជូនពលរដ្ឋ ដែលបានអាស្រ័យផលជាក់ស្តែង។ ដីធ្លីដែលកាត់ឆ្វៀលចេញពីតំបន់ឧទ្យានជាតិបូទុមសាគរ នោះមាន ចំនួនផ្ទៃដី ៣០,០៦៤,៥១ហិកតា សម្រាប់បែងចែកជូនប្រជាពលរដ្ឋ។ចំណែកលោក សុខ សុទ្ធី អភិបាលរងខេត្តកោះកុង មិនបានធ្វើការបែងចែកជូនប្រជាពលរដ្ឋនោះទេ បែជាបញ្ជអោយកងកម្លាំងមន្ត្រីបរិស្ថាន ទៅកាប់ដំណាំប្រជាពលរដ្ឋទៅវិញ។
តាមប្រភពច្បាស់ការបានអោយដឹងថា មានក្រុមហ៊ុនមួយចូលមកវិនិយោគទីតាំងដីនេះ ចំនួន១០ ០០០ ហិកតា ក៍ប៉ុន្តែការសិក្សាស្រាវជ្រាវ លើដីនេះឃើញថា ខ្វះដីជូនក្រុមហ៊ុន ទើបលោក សុខ សុទ្ធី ញាប់ដៃញាប់ជើងរៀបចំចាត់ចែងដឹកនាំកងកម្លាំងកាប់ដំណាំប្រជាពលរដ្ឋ ដើម្បីយកដី ប្រជាពលរដ្ឋដែលបាននិងកំពុងអាស្រ័យផលជាក់ស្តែងនោះ យកដីទៅបំពេញឲ្យក្រុមហ៊ុននោះ។
ប្រជាពលរដ្ឋបានរិះគន់ទាំងទឹកភ្នែកថា លោក សុខ សុទ្ធី អភិបាលរងខេត្តកោះកុង បានធ្វើឲ្យប៉ះពាល់ដល់ជីវភាពប្រជាពលរដ្ឋយ៉ាងធ្ងន់ធ្ងរបំផុត នៅក្នុងការច្របាច់ករប្រជាពលរដ្ឋនោះ ហើយចោទប្រកាន់ប្រជាពលរដ្ឋថា មករស់នៅដីក្នុងតំបន់ឧទ្យានជាតិបុទុមសាគរទៅវិញ។
លោក សុខ សុទ្ធី បានធ្វើឲ្យប្រមុខរដ្ឋាភិបាលខកចិត្តយ៉ាងខ្លាំងចំពោះការប្រើប្រាស់កម្លាំងប្រដាប់អាវុធ ទៅកាប់កម្ទេចដំណាំដាំដុះរបស់ពលរដ្ឋ។ លោក សុខ សុទ្ទី ធ្វើឱ្យសន្លឹកឆ្នោតគណបក្សប្រជាជនកម្ពុជាធ្លាក់យ៉ាងខ្លាំងនៅពេលខាងមុខនេះ ដោយសារធ្វើអោយពលរដ្ឋខកចិត្តនិងមានទុក្ខសោកនោះ។ ប្រជាពលរដ្ឋក៏បាននិយាយជាចំហរតាមរោងការហ្វេថា លោក សុខ សុទ្ធី អភិបាលរងខេត្តកោះកុង ដែលទទួលបន្ទកដីធ្លីនោះ ឡើងមកកាន់ដំណែងមក ដឹងតែកាប់ដំណាំប្រជាជនគ្រប់ស្រុក គ្រប់ឃុំ ក្នុងទឹកដីខេត្តកោះកុង។
ទន្ទឹមនោះ ប្រជាពលរដ្ឋក៍បានរិះគន់ទៅលើលោក ហាក់ ឡេង អភិបាលស្រុកបូទុមសាគរ បានបញ្ជាអោយលោក ក្រួច បូរី សីហា ដឹកនាំកម្លាំង ក្រោមឪវាទរបស់លោក មកកាប់ដំណាំដាំដុះរបស់ប្រជាពលរដ្ឋយ៉ាងឃោឃៅបំផុត ធ្វើប្រជាពលរដ្ឋបាត់បង់ទំនុកទុកចិត្ត ក្នុងការងារ បំរើប្រជាពលរដ្ឋនៅក្នុងស្រុកបូទុមសាគរនេះ។
សព្វថ្ងៃនេះ សម្តេចតេជោ ហ៊ុន សែន បានខិតខំប្រឹងប្រែងណាស់ដើម្បី ប្រយោជន៍ប្រជាពលរដ្ឋ ហើយស្រឡាញ់ប្រជាជនណាស់ តែមន្ត្រីរាជការ ថ្នាក់ក្រោមដូចជាលោក សុខ សុទ្ធី នេះ បែជាធ្វើឲ្យបាត់បង់តម្លៃប្រជាពលរដ្ឋយ៉ាងខ្លាំងទៅវិញ។
សូមសម្ដេច មេត្តាដាក់កម្លាំងចុះស្រាវជ្រាវ មន្ត្រីរាជការនៅក្នុងខេត្តកោះកុងនេះផង ឬមួយលោកជំទាវ មិថុនា ភូថង អភិបាលខេត្តកោះកុងមិន គោរពតាមប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ៕
សូមសម្ដេច មេត្តាដាក់កម្លាំងចុះស្រាវជ្រាវ មន្ត្រីរាជការនៅក្នុងខេត្តកោះកុងនេះផង ឬមួយលោកជំទាវ មិថុនា ភូថង អភិបាលខេត្តកោះកុងមិន គោរពតាមប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ៕