ខេត្តកោះកុង ៖ ប្រជាពលរដ្ឋបានរិះគន់ ទៅលើមន្ត្រីដឹកនាំថ្នាក់ខេត្តកោះកុង យ៉ាងចាស់ដៃថា អាជ្ញាធរមិនបាន គិតគូរពីទុកលំបាករបស់ពលរដ្ឋដែលមានបញ្ហាដីធ្លីមិនចេះចបើមិនចេះហើយនោះទេ មិនតែប៉ុណ្ណោះថែមទាំងក្លាហាន ប្រល័យដំណាំ ដាំដុះរបស់ប្រជាពលរដ្ឋក្រីក្រ ដែលពួកគាត់ខិតខំប្រឹងប្រែងដាំដុះអាស្រ័យផលជាក់ស្តែងថែមទៀតផង។
ពលរដ្ឋក្នុងខេត្តកោះកុង៩០ភាគរយ បានរិះគន់យ៉ាងខ្លាំងចំពោះលោក សុខ សុទ្ធី អភិបាលរងខេត្តកោះកុងថា ចាប់តាំងពីលោក សុខ សុទ្ធី កាន់តំណែងអភិបាលរងខេត្ត ទទួលបន្ទុកផ្នែកដីធ្លីមក ប្រជាពលរដ្ឋតែងជួបប្រទះនូវបញ្ហា ដោយលោក សុខ សុទ្ធី មិនដោះស្រាយ បញ្ហាដីធ្លីជូនពលរដ្ឋ នៅកន្លែងណាបាននោះទេ ក្រៅអំពីដើរបំផ្លិចបំផ្លាញដំណាំដាំដុះរបស់ប្រជាពលរដ្ឋ គ្រប់ឃុំ គ្រប់ស្រុកតែម្ដង ហើយធ្វីបានតែចំពោះ ប្រជាពលរដ្ឋក្រីក្រ មានដីធ្លីចំការបន្តិចបន្តួច ត្រូវបានលោក សុខ សុទ្ធី ដឹកនាំកម្លាំង ដើរកាប់ដំណាំពលរដ្ឋ ហើយមានលេសថាពលរដ្ឋរស់នៅលើដី ឧទ្យានជាតិ លើដីរតំបន់ការពារទៅវិញ។
ពាក់ព័ន្ធក្នុងរឿងនេះ អ្នកសារព័ត៌មានបានសុំណាត់ជួបលោក សុខ សុទ្ធី អភិបាលរងខេត្ត ដើម្បីរួមចំណែកសួរនាំព័ត៌មានពីបញ្ហាកាប់ ដំណាំដាំដុះរបស់ពលរដ្ឋ រួមនឹងការកាត់ឆ្វៀលដីធ្លីជូនពលរដ្ឋ យោងតាមអនុក្រិត្យលេខ៣០ សនក្រ,បក ដែលប្រមុខថ្នាក់ដឹកនាំ បានយល់ព្រមកាត់ឆ្វៀលដីធ្លីសំរាប់ពលរដ្ឋនោះ។
ពាក់ព័ន្ធក្នុងការណាត់ជួបលោក សុខ សុទ្ធី តាមទូរស័ព្ទ រឿងកាប់ដំណាំពលរដ្ឋនោះ លោក សុខ សុទ្ធី បានបង្វែរឿងអោយអ្នកសារព័ត៌មានទៅជួប មេបរិស្ថាន លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងទៅ ហើយអ្នកសារព័ត៌មានយើងបានទៅជួបប្រធានមន្ទីរបរិស្ថាន លោក ហ៊ុន ម៉ារ៉ាឌី លោកប្រធានមន្ទីរបាននិយាយថា រឿងទាំងអស់នេះ លោក ឈីវ ទៅសួរលោក សុខ សុទ្ធី ទៅ រឿងនេះខេត្តជាអ្នកគ្រប់គ្រងទេ លោក ឈីវ។
អ្នកសារព័ត៌មានក៍បានត្រឡប់មកវិញ ហើយក៏ទូរស័ព្ទទៅណាត់ជួបលោក សុខ សុទ្ធី ម្ដងទៀត តែលោក សុខ សុទ្ធី មិន ព្រមជួបទេ ដោយយកលេសថា ប្រជុំពេញមួយថ្ងៃនេះ មិនបានជួបទេ។ លឺដូច្នេះ អ្នកសារព័ត៌មានក៍បានទូរស័ព្ទទៅលោកជំទាវ មិថុនា ភូថង អភិបាលខេត្តកោះកុង ដើម្បីសួរនាំ ពីបញ្ហាដីធ្លីជូនពលរដ្ឋ តែត្រូវបានជំនួយការរបស់ជំទាវនិយាយថាលោក ជំទាវ កំពុងជាប់ប្រជុំ។ លឺដូច្នោះ អ្នកសារព័ត៌មានក៍មក សាលាខេត្តអង្គុយរង់ចាំជួបលោកជំទាវ អភិបាលខេត្ត រយៈពេលជាង១ម៉ោង ក៍បានជួបលោកជំទាវអភិបាលខេត្ត ហើយនៅពេលនោះ លោក ជំទាវនិយាយថា លោកពូឈីវទៅជួបលោក សុខ សុទ្ធី ទៅ រឿងរ៉ាវនេះពីព្រោះលោក សុខ សុទ្ធី គាត់ជាអ្នកទទួល។
អ្នកសារព័ត៌មានក៍ទូរស័ព្ទណាត់ជួបលោក សុខ សុទ្ធី ជាចុងក្រោយ ហើយលោក សុខ សុទ្ទី ព្រមព្រៀងជួប បានជជែកគ្នា រកដំណោះស្រាយជូនប្រជាពលរដ្ឋ ក៍ប៉ុន្តែលោក សុខ សុទ្ធី បដិសេធទាំងស្រុងថា ដីធ្លីទាំងអស់នោះមិនបានកាត់ឆ្វៀលបែងចែកជូនប្រជាពលរដ្ឋទេ ពីព្រោះដីទាំងអស់នេះ ប្រជាពលរដ្ឋទៅកាប់ទន្ទា្រនយកដីតំបន់ឧទ្យានជាតិ បុទុមសាគរ ហើយលោក សុខ សុទ្ធី បន្តទៀតថា រឿងកាប់ដំណាំនោះ ជារឿងរបស់ខាងបរិស្ថាន ពីព្រោះប្រជាពលរដ្ឋនោះទៅរស់នៅលើដីបរិស្ថាន ហើយក្នុងការសួរនាំ ជជែករកដំណោះស្រាយជូនពលរដ្ឋនោះ ក្នុងនោះក៏មានលោកប្រធានមន្ទីរបរិស្ថានចូលរួមដែរ។ តែការពិតនោះលោក សុខ សុទ្ធី មិនយល់ព្រមរកដំណោះស្រាយជូនពលរដ្ឋនោះទេ លោក សុខ សុទ្ធី និយាយថា បើប្រជាពលរដ្ឋចង់បានដីនោះ អោយទៅស្នើសុំក្រសួងបរិស្ថានទៅ។
ប្រជាពលរដ្ឋបានរិះគន់ទៅលើលោកជំទាវ មិថុនា ភូថង អភិបាលខេត្តកោះកុង ថា ក្នុងនាមលោកជំទាវ កាន់ដំណែងដឹកនាំខេត្តកោះកុងទាំងមូល មិនដែលសូវយកចិត្តទុកដាក់ចំពោះរឿងដីធ្លីសំរាប់ប្រជាជននោះទេ ទុកអោយលោក សុខ សុទ្ធី ធ្វើភ្លៀងធ្វើផ្ឡរតាមអំពើចិត្ត។ ប្រជាពលរដ្ឋក្នុងខេត្តកោះកុង ពិតជាសោកស្តាយចំពោះការដឹកនាំរបស់លោកជំទាវ ដែលមិនបានគិតគូរមន្ត្រីក្រោមឱវាទ ទុកអោយ មន្ត្រីខិលខូចមួយចំនួនឆ្លៀតឱកាស ធ្វើបាបប្រជាពលរដ្ឋ កេងចំណេញក្នុងផលប្រយោជន៍មួយលាក់លៀម រងចាំផលប្រយោជនធំៗមកដល់ដៃយ៉ាងស្រួល ក្នុងប្រអប់សំងាត់ គឺកុងធានាគារ។
ប្រជាពលរដ្ឋលើកដៃសំពះថា មានតែសម្តេចតេជោ ហ៊ុន សែន ទេ ដែលជួយប្រជាពលរដ្ឋបាននោះ។ សម្ដេចអើយ មន្ត្រីរាជការថ្នាក់ក្រោមមិនស្ដាប់បង្គាប់ប្រសាសន៍របស់សម្តេចទេ មន្ត្រីទាំងនេះពិតជាយកថ្នាំឈឺក្បាលអោយសម្ដេចទៀតហើយ ៕