ខេត្តកំពង់ធំ ៖ នៅវេលាម៉ោង២០:២០នាទីយប់ ថ្ងៃទី២៧ ខែមីនា ឆ្នាំ២០២៣ មានករណីឃាតកម្មមួយកើតឡើងនៅភូមិដំរីស្លាប់ ឃុំអណ្ដូងពោធិ៍ ស្រុកតាំងគោក ខេត្តកំពង់ធំ ។
តាមប្រភពនៅកន្លែងលើតហេតុបានឥ្យដឹងថា ជនសង្ស័យ ឈ្មោះ ស៊ឹម សុវណ្ណរិទ្ធ ភេទប្រុស អាយុ៣០ឆ្នាំ ស្រុកកំណើតនៅខេត្តសៀមរាប បច្ចុប្បន្នស្នាក់នៅ (រកស៊ីនៅភ្នំពេញផ្លូវ២០០៤) មុខរបរជាងទងស្រោបព្រះ បានយកអាវុធខ្លីម៉ាក( រ៉ូឡូ ) បាញ់ទៅលើជនរងគ្រោះចំនួន០៣នាក់ (ប្រុស១នាក់ ស្រី២នាក់) បណ្ដាលឱ្យរបួសចំនួន០១នាក់ និងស្លាប់ចំនួន០២នាក់ ៖
១ ឈ្មោះ ហៀង រតនា ភេទស្រី អាយុ១៨ឆ្នាំ មុខរបរមេផ្ទះ រស់នៅភូមិឃុំកើតហេតុ របួសចំក្បាលធ្ងន់យកទៅមន្ទីរពេទ្យកាល់ម៉ែត្រ (ត្រូវជាអតីតប្រពន្ធជនសង្ស័យ)។
២ ឈ្មោះ សួស ថាត ភេទស្រី អាយុ ៥៦ឆ្នាំ នៅភូមិឃុំកើតហេតុ មុខរបរធ្វើស្រែ ត្រូវចំក្បាល និងទ្រូងខាងឆ្វេង ស្លាប់នៅកន្លែងកើតហេតុ (ត្រូវជាយាយខាងអតីតប្រពន្ធជនសង្ស័យ) ។
៣ ឈ្មោះ ហៀង សុខធីន ភេទប្រុស អាយុ ១០ឆ្នាំ នៅភូមិឃុំកើតហេតុ មុខរបរជាសិស្ស បាញ់ចំក្បាល១គ្រាប់ស្លាប់នៅកន្លែងកើតហេតុ (ត្រូវជាប្អូនបង្កើតខាងអតីតប្រពន្ធជនស្ស័យ) ។
ប្រភពឲ្យដឹងទៀតថា ឈ្មោះ ស៊ឹម សុវណ្ណរិទ្ធ និង ឈ្មោះ ហៀង រតនា បានរៀបការជាមួយគ្នា តាមផ្លូវច្បាប់នៅឆ្នាំ២០២១ តែក្រោយមក រស់នៅមិនចុះសម្រុង ដោយសារឪពុកក្មេករបស់ជនរងគ្រោះ មិនពេញចិត្តនឹងជនរងគ្រោះ ។ ក្រោយមកទៀត នៅខែកុម្ភះឆ្នាំ២០២៣ ជនសង្ស័យនិងជនរងគ្រោះបានសម្រេចមកលែងលះគ្នានៅសាលាឃុំអណ្ដូងពោធិ៍ តែជនសង្ស័យនៅតែស្រឡាញ់និងទាក់ទងមកជនរងគ្រោះ តែជនជនរងគ្រោះមិនព្រមត្រូវរ៉ូវគ្នាវិញទេ លុះមកដល់ថ្ងៃទី២៧ ខែមិនា ឆ្នាំ២០២៣ វេលាម៉ោង២០និង២០នាទី ស្រាប់តែមានករណីឃាតកម្មដ៏ឃោឃៅដូចខាងលើកើតឡើង ហើយជនសង្ស័យ ឈ្មោះ ស៊ឹម សុវណ្ណរិទ្ធ បានកំពុងគេចខ្លួន ។
ករណីខាងលើនេះ កម្លាំងសម្ថកិច្ចកំពុងធ្វើការស្រាវជ្រាវស្វែងរកចាប់ខ្លួនជនសង្ស័យយកមកចាត់ការតាមនីតិវិធី ព័ត៌មានចុងក្រោយជនដៃដល់បានបាញ់សម្លាប់ខ្លួន៕