រាជធានីភ្នំពេញ ៖ នៅព្រឹកថ្ងៃសៅរ៍ទី២០ ខែមករា ឆ្នាំ២០២៤ ព្រះករុណា ព្រះបាទសម្ដេច ព្រះបរមនាថ នរោត្ដមសីហមុនី ព្រះករុណាជាអង្គម្ចាស់ជីវិតតំកល់លើត្បូង ព្រះមហាក្សត្រនៃព្រះរាជាណាចក្រកម្ពុជា និង សម្តេចមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈ ដ៍ខ្ពង់ខ្ពស់បំផុត ព្រះអង្គបានសព្វព្រះរាជហឫទ័យ ព្រះបរមរាជានុញ្ញាតដល់អ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា ដឹកនាំប្រតិភូក្រុមឧកញ៉ាចំនួន២០០នាក់ ចូលក្រាបថ្វាយបង្គំគាល់ នាព្រះរាជដំណាក់ សិរីមង្គល នែព្រះបរមរាជវាំង។
ទន្ទឹមនោះដែរ ព្រះករុណា ជាអង្គម្ចាស់ជីវិតតំកល់លើត្បូង ព្រះមហាក្សត្រនៃព្រះរាជាណាចក្រកម្ពុជា និងហ្លួងម៉ែ ជាទីគោរពសក្ការៈ ដ៍ខ្ពង់ខ្ពស់បំផុត បានប្រោសរាជទាន អ្នកឧកញ៉ា លី យ៉ុងផាត់ និងលោកជំទាវ គឹម ហ៊ាង ព្រមទាំងអនុប្រធាន សមាជិកក្រុមប្រឹក្សាភិបាល នៃសមាគមឧកញ៉ាកម្ពុជា ចូលក្រាបថ្វាយបង្គំ និងថ្វាយគ្រឿងសក្ការៈបូជាថ្វាយព្រះបរមរូប ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ នាបរិវេណខាងមុខ ព្រះរាជដំណាក់គន្ធបុប្ផា។
នៅក្នុងឱកាសដ៍ឧត្ដុងឧត្ថមប្រកបដោយមហាកិត្តិយសនេះដែរ អ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា បានទូលថ្វាយនូវសកម្មភាពរបស់ឧកញ៉ាជាច្រើន លើវិស័យមនុស្សធម៏ អប់រំ សង្គមកិច្ច សុខាភិបាល ពាណិជ្ជកម្ម និង វិនិយោគទុន ផ្សារភ្ជាប់ជាមួយបណ្ដាប្រទេសនានា ដើម្បីអោយប្រទេសកម្ពុជាយើងរីកចម្រើនទៅមុខជានិច្ច។ ទន្ទឹមនឹងនេះ អ្នកឧកញ៉ា លី យ៉ុងផាត់ បានថ្វាយព្រះរាជដង្វាយរួមមាន អង្ករ និង ថវិកាមួយចំនួន ដើម្បីចូលរួមចំណែកដង្ហែក្នុងព្រះរាជសកម្មភាពសប្បុរសធម៌ ប្រកបដោយទសពិធរាជធម៌របស់ព្រះអង្គទាំងទ្វេរ។
ព្រះករុណាអម្ចាស់ជីវិតតម្កល់លើត្បូង បានមានព្រះរាជបន្ទូល កោតសរសើរ ចំពោះកិច្ចខិតខំប្រឹងប្រែងរបស់អ្នកឧកញ៉ា លី យ៉ុងផាត់ និងលោកជំទាវ គឹម ហ៊ាង ក្នុងការដឹកនាំសមាគមឧកញ៉ាកម្ពុជា ទទួលបានជោគជ័យជាច្រើន នាពេលកន្លងមក។
ព្រះករុណា ជីវិតតម្កល់លើត្បូង បានប្រោសព្រះរាជទានពរជ័យ ជូនដល់សមាជិកសមាគមឧកញ៉ាកម្ពុជាចំនួន២០០នាក់ បាន ទទួលជោគជ័យ វិបុលសុខ គ្រប់ៗគ្នា៕
