ខេត្តកំពង់ធំ ៖ រដ្ឋបាលខេត្តកំពង់ធំ និងមន្រ្តីរាជការ កងកម្លាំងទាំងបីអង្គភាព សិស្សានុសិស្ស រួមទាំងប្រជាពលរដ្ឋ ទូទាំងខេត្តកំពង់ធំ បានចូលរួមក្នុងពិធីក្រុងពាលី និងបញ្ចុះបឋមសិលាសាងសង់រួបសំណាក អាចារ្យល័ក្ខ ដែលជាអាតីតមេទ័ព សម័យអាណានិគមបារាំង និងជាគ្រូផ្សំថ្នាំឪសថខ្មែរបុរាណមានបារមីខ្ពស់ហើយស័ក្កសិទ្ធ ដើម្បីទុកសម្រាប់ឲ្យប្រជាពលរដ្ឋខ្មែរគ្រប់រូប បានទៅគោរពសក្ការៈនិងប្រតិបត្តិតាមឪវាទ ព្រះពុទ្ធសាសនា និងដើម្បីឲ្យលោកបានថែរក្សាបីបាច់ប្រជាពលរដ្ឋខ្មែរ ទូទាំងប្រទេស ជាពិសេសនៅខេត្តកំពង់ធំ ឲ្យទទួលបានសេចក្តីសុខ សេចក្តីចម្រើន។
ពិធីក្រុងពាលីនិងបច្ចុះបឋមសិលា សាងសង់រូបសំណាក អាចារ្យល័ក្ខនេះ បានប្រារព្វធ្វើឡើងនៅចំណុច ច្រមុះជ្រូក ផ្លូវអាស៊ាន ក្នុងសង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ដោយមានការចូលរួមដោយ ឯកឧត្តម សុខ លូ អភិបាលនៃគណៈអភិបាលខេត្តកំពង់ធំ និងនិមន្តចូលរួមដោយ ព្រះទេពសត្ថាបារមី សៀង សុខ ព្រះរាជាគណៈថ្នាក់ចត្វា និងជាមេគណខេត្តកំពង់ធំ ព្រមទាំងមន្រ្តីរាជការកងកម្លាំងសិស្សានុសិស្ស និងពលរដ្ឋយ៉ាងច្រើនកុះករ ។
ឯកឧត្តម សុខ លូ អភិបាលខេត្តកំពង់ធំ មានប្រសាសន៍ថា ការសាងសង់រូបសំណាក អាចារ្យល័ក្ខ នេះ មានកម្ពស់ជាង៩ម៉ែត្រ ទាំងជើងទម្រ ចំណែករូបសំណាកសុទ្ធ មានកម្ពស់៤;៥០ម៉ែត្រ ដែលសាងសង់អំពីស្ពាន់ មានទម្ងន់សរុប ជិត១០០តោន សង់នៅលើទីតាំងសួនច្បារច្រមុះជ្រូក ភូមិក្រចាប់ សង្កាត់អាចារ្យល័ក្ខ ក្រុងស្ទឹងសែន ខេត្តកំពង់ធំ ។
ហើយរូបសំណាកនេះគឺសាងសង់ឡើង ចង់បង្ហាញពី ភាពខ្លាំងរបស់មេទ័ព អាចារ្យល័ក្ខ និងជំនឿផ្នែកព្រះពុទ្ធសាសនា នាសម័យអាណានិគមបារាំង ជួយអោយប្រទេសជាតិ បានសេចក្តីសុខចម្រើន ។
ឯកឧត្តម សុខ លូ បានបញ្ជាក់ថា រូបសំណាកនេះ នាពេលបច្ចុប្បន្ននេះ មានភ័ពសំណាងដែលបានរស់នៅ ជ្រកក្រោមម្លប់សន្តិភាពសម្តេចតេជោ ហ៊ុន សែន ជាប្រមុខរាជរដ្ឋាភិបាល បាននាំមកនូវសន្តិភាពជូនបងប្អូនខ្មែរទូទាំងប្រទេស។
ឯកឧត្តម បានថ្លែងបញ្ញ្ជាក់ថា ប្រទេសយើងមានសន្តិភាព យើងបានមកធ្វើបុណ្យរួមគ្នា ធ្វើពិធីសាសនាជា មួយគ្នាដ៏សប្បាយរីករាយជាមួយគ្នា កក្តាទាំងនេះក៏ដោយសារតែប្រទេសយើងមានសន្តិភាព ជាពិសេសនោះ នៅថ្ងៃទី៩ ខែវិច្ឆិកា ឆ្នាំ ២០១៩នេះ រដ្ឋបាលខេត្តកំពង់ធំ និងរៀបចំពិធីបុណ្យឯករាជ្យជាតិ នៅទីតាំងវិមានឯករាជ្យដែលទើបតែសាងសង់ថ្មីនៅពេល លុះបន្ទាប់មកក៏មានពិធីហូបអំបុកសាមគ្គី ការពារ ជាតិ សាសនា ព្រះមហាក្សត្រ នៅសួនច្បារគល់ស្ពានស្ទឹងសែន និងមានកម្មវិធីចែកអំបុកព្រី ជូនបងប្អូនប្រជាពលរដ្ឋ ដែលបានអញ្ជើញចូលរួមនិងធ្វើដំណើរឆ្លងកាត់ មកទទួលយកអំបុកពិសារ និងនៅពេលរាត្រី មានការប្រារព្វពិធីនៅវិមានឯករាជ្យ ដែលមានការបាញ់កាំជ្រួចដើម្បីអបអរសាទរបុណ្យឯករាជ្យជាតិ និងជាថ្ងៃកំណើតកងទ័ពរបស់យើង ៕