ខេត្តកោះកុង៖ ចំណីអាហារដែលសម្រាប់អ្នកមានអំណាច អ្នកមានលុយ គឺដីព្រៃកោងកាង ដីមាត់ព្រែក ដីព្រៃលិចទឹក ចំណីទាំង(៣មុខ)គឺគេចូលចិត្តបំផុត ពីព្រោះវាមានរសជាតិផ្អែមឆ្ងាញ់ពិសេស។ដីព្រៃកោងកាង ព្រៃលិចទឺកតាមបណ្ដោយមាត់ព្រែកតានូន ដែលអ្នកមានលុយ អ្នកមានអំណាច យកគ្រឿងចក្រមកឈូសឆាយ ប្រមាណជា៣០ជាងហិកតា ហើយជាប់បណ្ដោយមាត់ព្រែក ជិត១០០០ម៉ែត្រ។ ទីតាំងដីនេះពីមុនមក ស្ថិតនៅក្នុងភូមិតានូន ឃុំតានូន ស្រុកបុទុមសាគរ ខេត្តកោះកុង។បច្ចុប្បន្ន ទីតាំងដីនេះ ស្ថិតនៅក្នុងភូមិតានីថ្មី ឃុំភ្ញីមាស ស្រុកគីរីសាគរ ខេត្តកោះកុងវិញ។
តាមប្រភពព័ត៌មានពីលោកមេភូមិតានីថ្មីឈ្មោះ រស់ ជ័យស៊ីន បាននិយាយប្រាប់អ្នកសារព័ត៌មានយើងថា ដីនេះម្ចាស់អ្នកទិញនៅភ្នំពេញ ឯម្ចាស់ដីនៅក្នុងភូមិរបស់គាត់។ លោកមេភូមិបន្តថា អ្នកទិញដីនេះគីទិញតែ២ហិកតាទេ តែដល់យកគ្រឿងចក្រមកឈូសឆាយដីរាប់សិបហិកតាឯនោះ ហើយការឈូសឆាយក៍មិនមាន ស្នើសុំច្បាប់ដែរ។ លោកមេភូមិ គាត់និយាយទៀតថា អ្នកមានអំណាច គេធ្វើតែអញ្ចឹងទេ យកគ្រឿងមកឈូសឆាយដល់មាត់ព្រែក វាមិនត្រឹមត្រូវទេ ពីព្រោះគេទុកព្រៃកោងកាង សម្រាប់ប្រជាពលរដ្ឋអាស្រ័យផលខ្យងក្ដាម បើអស់ព្រៃកោងកាង មានខ្យងក្ដាម ត្រីពងកូនឯណាទៀត។
ពាក់ព័ន្ធរឿងរ៉ាវឈូសឆាយដីព្រៃកោងកាង ដីព្រៃព្រែកនេះ អ្នកសារព័ត៌មានយើងបានទូរស័ព្ទមកសួរលោកមេឃុំភ្ញីមាស ឈ្មោះ ឡុញ់ សុផល គាត់ថា គាត់មិនបានដឹងគេយកគ្រឿងចក្រមកឈូសឆាយដីនោះទេ
ចាំគាត់អោយ លោកមេភូមិទៅមើលសិន។ លោកមេឃុំ ឡុញ់ សុផល បន្តថា ពួកនេះមកឈូសឆាយដី មិនបានស្នើសុំច្បាប់ទេ។ ក្រោយមក អ្នកសារព័ត៌មានយើងក៏បានមកជួបលោកមេឃុំផ្ទាល់ដើម្បីសាកសួរដីដែលបានឈូសឆាយនេះសួរការពិត លោកមេឃុំ ឡុញ សុផល ក៍បានប្រាប់អោយលោកមេភូមិឈ្មោះ រស់ ជ័យស៊ីន អោយជូនអ្នកសារព័ត៌មានយើងទៅទីតាំងដីនោះ ស្រាប់តែទៅដល់ដីនោះ លោកមេឃុំបានទូរស័ព្ទមកលោកមេភូមិថា អោយលោកមេភូមិត្រឡប់មកវិញបន្ទាន់ហើយមិនត្រូវចូលក្នុងដីរបស់គេទេ នេះជាសម្ដីលោកមេភូមិប្រាប់អ្នកសារព័ត៌មានយើងចំពោះមុខ។
នៅពេលលោកមេភូមិ កំពុងនិយាយទូរស័ព្ទ ក៍បានហុចទូរស័ព្ទមកជួបជាមួយអ្នកសារព័ត៌មាន លោកមេឃុំគាត់ថា អោយត្រឡប់មកវិញជាបន្ទាន់ មកនិយាយគ្នា នៅសាលាឃុំ ហើយលោកមេឃុំហាមមិនឱ្យចូលក្នុងដីរបស់គេទៀត។ លោកមេឃុំបន្តថា ចាំគាត់រាយការណ៍ទៅស្រុកសិនរឿងនេះ។ នៅពេលនោះលោកមេភូមិ និង អ្នកសារព័ត៌មានបីនាក់ក៏បានមកដល់សាលាឃុំ លោកមេឃុំ និយាយថា ដីទាំងអស់នោះ (ប្រមាណ៣០ហិកតាជាងទេ)មិនដូចអ្នកសារព័ត៌មានថា 60ហិកតាទៅ70ហិកតានោះទេ។ លោកមេឃុំ បន្តទៀតថា ម្ចាស់ដីគាត់ទិញពីពលរដ្ឋពីប្លង់ដែរ គឺប្លង់លេខ ២០និងលេខ២១។ លោកមេឃុំ និយាយ ប្រាប់ថា ម្ចាស់ដី គឺលោកជំទាវនៅទីក្រុងភ្នំពេញ ឈ្មោះជំទាវ សុខាឡៃ គាត់មកទិញដីនេះចង់អភិវឌ្ឍន៍។
តាមប្រភពព័ត៌មានពីប្រជាពលរដ្ឋ និងអ្នកជិតស្និទ្ធជាមួយលោកមេឃុំ សូមមិនបញ្ចេញឈ្មោះ បានប្រាប់អ្នកសារព័ត៌មានយើងថា បន្ទាប់ពីអ្នកសារព័ត៌មាន ពេញទៅបាត់ លោកមេឃុំភ័យខ្លាច ក៍នាំគ្នាបីនាក់និងមេការម្ចាស់ដីម្នាក់ ចុះដល់ទីតាំងដីកំពុងឈូសឆាយនោះ ហើយក៍នាំគ្នាថតរូបភាពដីបីបួនប៉ុស្តិ៍ ហើយមិនដល់ទីតាំងកន្លែងឈូសឆាយនោះផង ក៍ត្រឡប់មកវិញយ៉ាងប្រញាប់ប្រញាល់ ខ្លាចអ្នកសារព័ត៌មានតាមទៅមើល ។លោកមេឃុំ ឡុញ់ សុផល ពេលជួបជាមួយអ្នកសារព័ត៌មាន ហាក់បីដូចជាមានការ លាក់លៀមប្រកបដោយអាកំបាំង មិននិយាយការពិត ឲ្យបានច្បាស់លាស់ឡើយ លោកមេឃុំ ប្រហែល កំពុងរងចាំលាភសក្ការៈដ៏ធំសម្បើមពីម្ចាស់ដីហើយ ពេលម្ចាស់ដីបានសម្រេច។
ពាក់ព័ន្ធរឿងឈូសឆាយ ដីព្រៃកោងកាង ដីមាត់ព្រែក ដីព្រៃលិចទឹកនេះ អ្នកសារព័ត៌មានយើងទូរស័ព្ទទៅលោក ទួន ឪទី អភិបាលរងស្រុកគីរីសាគរ ទទួលបន្ទុកកិច្ចការដីធ្លី លោកថា ចាំគាត់សួរទៅលោកមេឃុំភ្ញីមាសសិន រឿងនេះពីព្រោះលោកមិនទាន់លឺលោកមេឃុំរាយការណ៍មកទេ ។លោកអភិបាលបន្តទៀតថា បើលោកមានពេលលោកនិងចុះមកត្រួតពិនិត្យមើលរឿងនេះ ហេតុអ្វីគេឈូសឆាយដីធំយ៉ាងនេះ លោកមេឃុំមិន រាយការណ៍មក។
សង្ឃឹមថា លោក ចេង មុន្នី រិទ្ធ អភិបាលនៃគណៈអភិបាលស្រុកគីរីសាគរ និងលោកជំទាវ មិថុនា ភូថង អភិបាលខេត្តកោះកុង មេត្តាពិនិត្យមើលរឿងនេះផង ជៀសវាង កន្ទេលធំបន្លំដេក។
ហើយកុំអោយពលរដ្ឋមានការ រិះគន់តាមតុកាហ្វេថា ពលរដ្ឋក្រីក្រ ធ្វើមិនបាន ចំណែកអ្នកធំ អ្នកមានអំណាច ធ្វើតាមអំពើចិត្តក្មានច្បាប់៕
