ខេត្តកោះកុង ៖ ទំនាស់កើតទុក្ខមិនសុខចិត្តរបស់ប្រជានេសាទឃុំថ្មស ស្រុកបូទុមសាគរ បានឡើងកម្តៅឡើងវិញតាមរយៈការតវ៉ាទាមទារដល់ថ្នាក់ខេត្ត ស្នើសុំជួយដោះស្រាយ ក្រោយមួយថ្ងៃនៃការប្តឹងផ្តល់ អាជ្ញាធរខេត្តកោះកុង។មន្ទីកសិកម្មខេត្តកោះកុងនឹងក្រុមការងារស្រុក ក៏ដោះស្រាយកំណត់ដែននេសាទគ្រែងឈាមជាថ្មី ដើម្បីបញ្ចប់វិវាទ។
សម្រែកទាមទាររបស់ប្រជានេសាទភូមិស្រែថ្មី និងភូមិស្រែត្រាវ ត្រូវបានគេមើលឃើញថា មានប្រសិទ្ធភាពជាងមុនឆ្ងាយ ដោយមានការចាត់តាំងរបស់លោកជំទាវ មិថុនា ភូថង អភិបាលខេត្ត ណែនាំដល់អភិបាលរងខេត្ត ព្រមទាំងអ្នកពាក់ព័ន្ធចុះដោះស្រាយភ្លាមៗ។
លោកស្រី អ៊ី នារីនេត អភិបាលរងខេត្តកោះកុង ថ្លែងក្នុងកិច្ចប្រជុំបន្ទាន់មួយរវាងប្រជានេសាទ និងម្ចាស់ស៊ុមគ្រែងឈាម ដែលរងការចោទប្រកាន់ថាបានពង្រីកទំហំអាជីវកម្មស៊ុមគ្រែងថា បញ្ហានេះមិនមែនជាថ្មីនោះទេ ពោលវាបានកើតយូរឆ្នាំមកហើយ ព្រោះតែមិនបានកំនត់ដែនទឹកសម្រាប់ការអាស្រ័យផលរួមគ្នាទើបបង្កជាជម្លោះមិនចេះចប់មិនចេះហើយបែបនេះ។
លោកស្រីអភិបាលរងខេត្តក៏បានសុំចិត្តដល់ប្រជានេសាទទាំងអស់រៀនចេះគោរពស្រឡាញ់យោគយល់គ្នាទៅវិញទៅមកអំពីការប្រមូលគ្រែងឈាមនេះប្រកបដោយតម្លាភាព ចៀសវាងបន្តពង្រីកបង្គោលស៊ុមគ្រែងឈាមលើផ្ទៃរសមុទ្របន្តទៀត។
ទន្ទឹមនោះ លោកស្រីពាក់ព័ន្ធដឹកនាំក្រុមការងារជំនាញចុះនិយាមកាផែនទី ដើម្បីកំនត់ដែននេសាទឱ្យច្បាស់លាស់ជាងមុនសំដៅដល់ការបញ្ចប់ទំនាស់ឈរលើនយោបាយឈ្នះឈ្នះក្រៅប្រព័ន្ធតុលាការ។
រដ្ឋបាលខេត្តកោះកុង មន្ទីរកសិកម្ម និងរដ្ឋបាលស្រុកបូទុមសាគរ បានសុំដកអូសស៊ុមគ្រែងរបស់លោក លូ ផល្លី ដែលមានទំហំជាង៦ហិចតា ដោយកាត់៤ហិចតាចេញទៅឱ្យប្រជានេសាទទុកអាស្រ័យរួមគ្នា ព្រោះទំនាស់កើតចេញពីការរំលោភបំពានដែនសហគមន។
ប្រជានេសាទចំនួន២០០គ្រួសារនៅឃុំថ្មស កាលពីថ្ងៃទី២៤ ខែសីហា ឆ្នាំ២០២៣ ថ្មីៗនេះ លើកគ្នាមកមុខសាលាខេត្តកោះកុងសុំប្តឹងទៅលោកជំទាវ អភិបាលខេត្ត អំពីបាតុភាពមិនល្អមួយចំនួនរឿងវិវាទដែនសហគមន។
លោកស្រី ណាវី និង សៀត សុខន តំណាងប្រជានេសាទមកពីភូមិស្រែថ្មី និងភូមិស្រែត្រាវ ឃុំថ្មស ដាក់ញ្ញាត្តិសុំប្តឹងដកប្រធានសហគមន៍ ឈ្មោះ តេង ហាន់ និង មន្រ្តីជលផល ឈ្មោះ ព្រំ សុវណ្ណា នាយផ្នែករដ្ឋបាលជលផលបូទុមសាគរ ដែលមានទីស្នាក់ការនៅក្នុងភូមិស្រែថ្មី ដោយពួកគាត់ចោទថា បានបើកដៃឱ្យអ្នកមានការបោះបង្គោលវាតទីយកដែននេសាទធ្វើជាកម្មសិទ្ធិពីបុគ្គលឈ្មោះ លូ ផល្លី រស់នៅក្នុងភូមិស្រែត្រាវ ក្រោមរូបភាពថាចិញ្ចឹមគ្រែងឈាមធ្វើឱ្យដែននេសាទក្នុងសហគមន៍កាន់តែរួមតូចទៅៗប៉ះពាល់ដល់កត្តាជីវភាពរបស់ពួកគាត់សព្វថ្ងៃនេះ។
ទម្រង់អាជីវកម្មពង្រីកលើផ្ទៃសមុទ្រស្ថិតនៅក្នុងមូលដ្ឋានឃុំថ្មស ពុំមានមន្ទីរស្ថាប័នណាចេញច្បាប់អនុញ្ញាត្តនោះទេ ដូច្នេះការមានទំនាស់គ្នារវាងប្រជានេសាទនិងប្រជានេសាទដូចគ្នាសុទ្ធតែខុសច្បាប់ទាំងអស់។
ប៉ុន្តែមើលឃើញពីជីវភាពរស់នៅមិនដឹងពួកគាត់ទៅប្រកបមុខរបរអ្វីក្រៅពីនេសាទ ក៏រដ្ឋបាលខេត្ត និងមន្ទីរជំនាញ រមែងតែមានការយោគយល់ពីមនោសញ្ចេតនាសម្រាប់ការអាស្រ័យផល។
លោក អ៊ី ម៉េងលាង ពន្យល់ទៀតថា ការនេសាទខ្យងស និងពង្រីកស៊ុមគ្រែងឈាម រដ្ឋបាលជលផលស្រុកបូទុមសាគរតែងចុះបង្រ្កាបទប់ស្កាត់ជាប្រចាំការ មន្រ្តីជំនាញថាមិនបង្រ្កាបទៅវិញ។
តែទោះយ៉ាងណា លោកជឿជាក់ថា ទំនាស់បញ្ហាខាងលើនឹងត្រូវបានបញ្ចប់ ក្រោយកំណត់ដែននេសាទច្បាស់លាស់ជំនួសមកវិញនូវការស់នៅសុខុមរមនាក្នុងមូលដ្ឋាន។
ចំពោះលោក ក្រូច សីហា អភិបាលស្រុកបូទុមសាគរ ឯកភាពចំពោះចំណាត់ការរដ្ឋបាលខេត្ត និងមន្ទីរជំនាញ ដោយលោកយល់ថា ចាំបាច់ត្រូវតែមានការកំណត់តំបន់ជាឡូតិ៍ និងដាក់ឈ្មោះប្រជានេសាទកុំឱ្យបន្តទន្រ្ទានវាទទីបន្ថែមដែលនាំឱ្យបញ្ហាកើតមានមិនចេះឈប់មិនចេះឈរ ដោយ១គ្រួសារអាចទទួលបាន១ហិចតាកន្លះសម្រាប់មើលថែចិញ្ចឹមគ្រែងឈាមរបស់ខ្លួន។
លោកអភិបាលស្រុកបូទុមសាគរ មើលឃើញថា នៅពេលបានដោះស្រាយបែបនេះហើយ ការរស់នៅប្រមូលគ្រែងឈាមរបស់ប្រជានេសាទនឹងស្ងប់ចិត្ត និងឈប់ច្រណែនគ្នា។
នៅការ ដោះស្រាយនោះ ប្រនេសាទ ស្នើសុំ លោកស្រី ដកមេសហគមន ឈ្មោះ តេង ហាន់ ចេញ ដោយសារលោកបើកដៃឲ្យមានបទល្មើសកើតឡើងពេញផ្ទៃរ សមុទ្រថ្មស ហើយមានរឿងអាស្រូវយ៉ាងច្រើនក្នុងដែនសហគមន។
ប្រជានេសាទដែលបានមកចូលរួមនៅក្នុងការដោះស្រាយវិវាទនេះ បានស្រឡាញ់ពាក្យពេជ្ររបស់លោកស្រី អ៊ី នារីនេត អភិបាលរងខេត្តកោះកុង ធ្វើឲ្យពលរដ្ឋមានការពេញចិត្តយ៉ាងខ្លាំងចំពោះលោកស្រីអភិបាលរង ខេត្តកោះកុង។
តែគួរអស់សំណើច នឹកស្មានមិនដល់ នៅក្នុងការយល់សប្តិថា បានរើសមាសមួយដុំធំ បន្ទាប់ពីមានកាយល់សប្តិនោះ ដឹងអីយល់សប្តិរើសបាន មនុស្សពីរនាក់ទៅវិញ ម្នាក់នោះជានាយផ្នែករដ្ឋបាលជលផលបូទុមសាគរ ឈ្មោះ ព្រំ សុវណ្ណា ទៅវិញ ដែលប្រជានេសាទប្រមាណ200គ្រួសារដែលតវ៉ានៅមុខសាលាខេត្តកោះកុង សុំដកឈ្មោះ ព្រំ សុវណ្ណា ចេញពីតំបន់ស្រុកបូទុមសាគរ ពលរដ្ឋខ្លាចក្រែងដុំខ្មៅនេះធ្លាក់ចុះក្នុងទឹកសមុទ្រ ធ្វើឲ្យក្ដាមបង្ការ ត្រី ងងឹតភ្នែកអស់ និងម្នាក់ទៀត ជាបងធំរបស់គេ។
មូលហេតុដោយសារមានអ្នកសារព័ត៌មានពីរនាក់ សុំបទសម្ភាសន ពាក់ព័ន្ធបទល្មើសនេសាទក្នុងសមុទ្រថ្មស ដោយមានបឹតបាំងពីអំពើពុករលួយយ៉ាងធ្ងន់ធ្ងរ ធ្វើឲ្យ ធនធាននេសាទធ្លាក់ចុះខ្លាំងមកពីភាពបឹតបាំង ហើយបានប្រើអំពើហឹង្សាពាក្យពេជ្រ ដែលសង្គមស្អប់ខ្ពើម ភ័យខ្លាចបំផុត រឿងរ៉ាវនេះ មុខសាលាឃុំថ្មស លើផ្លូវ សាធារណ: មហាជនកំពុងឆ្ងល់ថា នៅក្នុងខេត្តកោះកុង មានមន្រ្តីអញ្ចឹងដែរ៕
