ខេត្តបន្ទាយមានជ័យ ៖ ”បើគ្រាន់តែរឿងផ្លូវសម្រាប់ពលរដ្ឋពីរគ្រួសារធ្វើដំណើរចេញចូលផ្ទះបន្តិចបន្តួចសោះ គ្មានសមត្ថភាពដោះស្រាយជូនពួកគាត់ផងនោះ។ ប្រជាពលរដ្ឋប្តឹងសុំឱ្យអាជ្ញាធរស្រុកដោះស្រាយរាប់ខែគ្មានបានផលអ្វីបន្តិចសោះឡើយ តើឱ្យពលរដ្ឋពឹងអីទៀត…”។នេះជាខ្លឹមសារសង្ខេបនៃអត្ថបទរិ:គន់ដែលបានទើបចេញកាលពីថ្មីៗនេះ ។
ជាការឆ្លើយតបរបស់រដ្ឋបាលស្រុកភ្នំស្រុកបានបំភ្លឺកាលពីថ្មីៗនេះថា : ករណីខាងលើនេះ ជាករណីវិវាទដីធ្លី(បិទផ្លូវ)ដែលមានដើមបណ្ដឹងឈ្មោះ ជិន សេង និងឈ្មោះ ឈុត សារឹទ្ធ បានប្តឹងទាមទារសុំបើកផ្លូវពីឈ្មោះ ឈិវ សាវុន និងប្រពន្ធឈ្មោះ ឈីវ សុកូឡា មានទីតាំងនៅជាប់មាត់ស្ទឹងភូមិស្ពានក្មេង ឃុំភ្នំដី ស្រុកភ្នំស្រុក ។ ករណីនេះអាជ្ញាធរបានធ្វើការដោះស្រាយដោយសម្របសម្រួលនៅថ្នាក់ភូមិ-ឃុំ ចំនួនពីរលើករួចមក ប៉ុន្តែពុំទទួលបានលទ្ធផល ឯកភាពបញ្ចប់វិវាទឡើយ។
លុះមកដល់ថ្ងៃទី១២ខែកុម្ភៈ ឆ្នាំ២០២៤ កន្លងមក រដ្ឋបាលស្រុកក៏បានទទួលដីកាអមបញ្ជូនរឿងលេខ០១០/២៤ ដកអ/ភដ របស់រដ្ឋបាលឃុំភ្នំដី ស្តីពីករណីវិវាទខាងលើ ក្នុងនោះរដ្ឋបាលស្រុកអនុវត្តតាមយន្តការដោះស្រាយវិវាទក្រៅប្រព័ន្ធតុលាការនិងក្នុងនាមគណៈកម្មការការសម្របសម្រួលវិវាទថ្នាក់ស្រុក បានធ្វើការសម្របសម្រួលចំនួន៣លើកទៀតគឺនៅតែពុំបានទទួលលទ្ធផលដូចខាងក្រោម៖
-លើកទី១ នៅថ្ងៃទី២៨ ខែកុម្ភៈ ឆ្នាំ២០២៤ ភាគីទាំងសងខាងមិនចុះសម្រុង និងឯកភាពបញ្ចប់វិវាទ។
-លើកទី២ នៅថ្ងៃទី១៤ខែមិថុនាឆ្នាំ២០២៤ ភាគីទាំងសងខាងនិងអ្នកពាក់ព័ន្ធ នៅតែមិនចុះសម្រុងនិងឯកភាពបញ្ចប់វិវាទនោះទេ។
-លើកទី៣ នៅថ្ងៃទី២៩ខែកក្កដាឆ្នាំ២០២៤ ភាគីទាំងសងខាងនិងអ្នកពាក់ព័ន្ធ នៅតែមិនចុះសម្រុងនិងឯកភាពបញ្ចប់វិវាទនោះទេ។
សូមជម្រាបជូនដែរថា នៅចន្លោះពេលនៃការសម្របសម្រួលពីមួយលើកទៅមួយលើកដោយមានរយៈពេលយូរនិងស្ងប់ស្ងាត់ ដោយសារភាគីចុងបណ្ដឹងឈ្មោះ ឈីវ សាវុន និងប្រពន្ធឈ្មោះ ឈីវ សុកូឡា បានប្រមូលផលស្រូវរួច និងរដូវប្រាំង ។
ឯភាគីដើមបណ្ដឹងឈ្មោះ ជិន សេង និងឈ្មោះ ឈុត សារឹទ្ធ អាចចេញចូលអាស្រ័យផលបានធម្មតា ។ ប៉ុន្តែលុះចូលដល់រដូវវស្សាធ្វើស្រូវពេញស្រែ ទើបភាគីទាំងសងខាងនេះ ចាប់ផ្តើមវិវាទឡើងវិញ។
រដ្ឋបាលស្រុកភ្នំស្រុកបានបន្តថា: ជាក់ស្តែងចូលដល់នៅថ្ងៃទី០៥ខែកញ្ញា ឆ្នាំ២០២៤ វេលាម៉ោង៨:៣០នាទីព្រឹកថ្មីៗនេះ ក្រុមការងារចម្រុះថ្នាក់ស្រុក ដឹកនាំដោយលោកជូ បុត្រ អភិបាលស្រុកនិងជាប្រធានគណៈកម្មាធិការសម្របសម្រួលវិវាទថ្នាក់ស្រុក បានចុះពិនិត្យទីតាំងដីជាក់ស្តែងនិងធ្វើការសម្របសម្រួលជាថ្មី ហើយបានការឯកភាពគ្នាជាបណ្តោះអាសន្ន។
គឺដោយភាគីចុងបណ្ដឹងឈ្មោះ ឈិវ សាវ៉ុន និងប្រពន្ធឈ្មោះ ឈីវ សុកូឡា អនុញ្ញាតឱ្យភាគីដើមបណ្ដឹងឈ្មោះ ជិន សេង និងឈ្មោះ ឈុត សារឹទ្ធ អាចចេញ -ចូលកាត់ដីរបស់ខ្លួនបានដើម្បីធ្វើការប្រមូលកសិផលស្រូវឱ្យរួចរាល់ និងរង់ចាំការសម្របសម្រួលជាបន្ត។
ចំពោះការលើកឡើងដោយដើមបណ្តឹងថា នៅចំណុចនោះមានផ្លូវបុរាណនោះ រដ្ឋបាលស្រុកបានយោងមេភូមិ មេឃុំនិងចាស់ទុំក្នុងភូមិដែលបានបញ្ជាក់ថា ចំណុចនោះពុំមានផ្លូវបូរាណឬផ្លូវរទេះ ផ្លូវថ្មើរជើងអីដែរ ។
ម៉្យាងវិញទៀត ក្រោមការចង្អុលបង្ហាញនិងការយកចិត្តទុកដាក់ខ្ពស់ពីថ្នាក់ដឹកនាំគ្រប់លំដាប់ថ្នាក់ផង លោកអភិបាលស្រុក នៅតែខិតខំសម្របសម្រួលរាល់បញ្ហា សំណើ សំណូមពររបស់ប្រជាពលរដ្ឋ ។
ជាក់ស្តែងដូចជាករណីនេះ ភាគីទាំងសងខាងគឺសុទ្ធតែមានប័ណ្ណកម្មសិទ្ធិដីធ្លី(ឬវិញ្ញាបនប័ត្រសម្គាល់ម្ចាស់អចលនវត្ថុឬប្លង់រឹង) រៀងៗខ្លួនរួចហើយដែរ (ដែលករណីនេះ គូភាគីគួរតែឬក៏បានដោះស្រាយវិវាទរួចហើយទើបជំនាញសុរិយោដី អាជ្ញាធរនិងគណ:កម្មការរដ្ឋបាលអាចបានវាស់វែងនិងចេញប្លង់ដីជូនបាន) ។
រដ្ឋបាលស្រុកបានបន្តទៀតថា : ករណីនេះ លោកអភិបាលស្រុក មិនមែនព្រងើយកន្តើយទេ គឺមានតែខិតខំព្យាយាមធ្វើការសម្របសម្រួលឱ្យអស់ពីលទ្ធភាព សមត្ថភាពក្នុងការសម្របសម្រួលដោះស្រាយតាមគោលនយោបាយឈ្នះ ឈ្នះរបស់សម្តេចតេជោ ។
ក្នុងនោះ មិនទាន់បញ្ជូនរឿងនេះទៅស្ថាប័នទទួលបណ្តឹងពាក់ព័ន្ធផ្សេងៗទៀតទេ ។
ចុងក្រោយ រដ្ឋបាលស្រុកភ្នំស្រុកក៏ស្នើសុំសារព័ត៌មាននិងបណ្តាញសង្គមអោយមុននឹងផុសឬចុះផ្សាយគួរជ្រាបច្បាស់ពីប្រវត្តិរឿង ឈរលើមូលដ្ឋាននិងប្រភពច្បាស់លាស់ គតិយុត្តិ មិនលម្អៀងពីគ្រប់ភាគី ពោលគឺពីពលរដ្ឋជាគូវិវាទ ពីអាជ្ញាធរមានសមត្ថកិច្ចពាក់ព័ន្ធ។
ពីព្រោះថា ការផ្សព្វផ្សាយព៍ត៌មានមិនពិតឬប្រឌិតឡើងពីភាគីតែម្ខាងក្នុងន័យបំផ្លើស បំភ័ន្ត មួលបង្កាច់បង្ខាុចកេរ្តិ៍អាចបង្កអោយមានការភ័ន្តច្រឡំដល់សារធារណ:ជន ជាការធ្វើឱ្យប៉ះពាល់កិត្តិយស សេចក្តីថ្លៃថ្នូរអាជ្ញាធរដែនដី និងសមត្ថកិច្ចជំនាញពាក់ព័ន្ធ។
ជាពិសេសវាបានធ្វើអោយខូចខាតទឹកចិត្តនិងកិច្ចខិតខំប្រឹងរបស់មន្ត្រីក្នុងការបំពេញការងារប្រកបដោយការទទួលខុសត្រូវនិងមានប្រសិទ្ធភាពចំពោះមុខតួនាទី ភារកិច្ច ក៏ដូចជាបម្រើសេវាជូនប្រជាពលរដ្ឋ៕
